Mantencion regular den Bubali Plas

DOW a tuma nota den social media cu tin keho over di trabou nan andando den Bubaliplas. Pa es motibo nos ta informa lo siguiente:

Dia 1 di februari 2020 DOW a cuminsa cu su plan di mantencion regular den Bubaliplas.  DOW ta bin ta haci pa varios aña caba. Mantencion regular ta consisti di kita matanan indesea y e waterlelie cu ta crece den Bubaliplas. 
E mantencion aki tin cu wordo haci pa mantene un bon fluho di awa y e calidad halto di awa pa Bubaliplas y proteha e flora/fauna den e plas. 

Si e mantencionnan aki no wordo haci Bubaliplas ta bay atras y cu e consequencia cu e flora y fauna tambe ta caba.

Den cuadro di esaki, DOW a tuma contacto cu DNM pa tin un bon colaboracion den e area aki. DNM ta informa cu e mantencion di Bubaliplas ta di sumo importancia pa cu e habitad y debi na e gran cantidad di waterlelie a bira hopi, tapando gran parti di Bubaliplas causando menos pasada di luz (solo) cu ta reduci oxygeno den e awa y esey ta pone e calidad bai atras. 

DOW a opta pa hasi uzo di su heavy equipment pa soluciona e problema mirando e magnitud di trabou.

Pa cu futuro mantencion DOW lo explora otro tipo di equipo por ehempel Everglades swamp boats. 

Duracion di e mantencion akinan lo ta 4 weekend. DOW ta pidi pueblo su comprencion pa cu e trabou.