Ultimo Desaroyonan riba e proyecto "Beach Zand"

Na promer lugar nos kier a gradici Minister President Sra. Evelyn Wever Croes pa e motivacion cu el a duna nos pa realisa e trabounan importante aki di mantencion y renobacionnan di nos patrimonionnan Natural y Historico y pa e fondonan cu e la yuda nos aloca pa por a realisa e trabounan valioso aki.

Durante e prome ola di e pandemia e comision Aruba Amenities a keda lanta y e renobacion di nos playanan tabata riba agenda, pero no tabata tin suficiente santo disponibel ni tampoco e fondonan financiero pa realisa e trabounan aki. 

Renobacion di Patrimonio Natural y Historico a bira parti di strategia di Gobierno di Aruba pa inverti den producto Aruba na caminda pa su recuperacion economico despues di e pandemia.
Cu e fondonan aloca nos a logra draga 18.000 m3 di santo blanco na Barcadera.

Despues cu e trabounan di draga e santo a termina y nos a bay over na prepara e santo, seft’e pa asina e ta cla pa transporta y deposita na e Playanan concerni pa renobacion.  

Na Arashi nos a transporta santo blanco y a haci algun otro trabou di infrastuctura pa canalisa e awa cu ta yobe pa asina e erosion ta menos y asina cuida e santo blanco mas cu ta posible.

Na Boca Catalina nos a yena 160 yarda di santo. 

Na Eagle Beach nos a basha santo blanco den e area cu antes tabata tin hopi campamento y e santo a deteriora masha hopi y a cambia di color. Tambe tabata tin masha hopi piedra di construccionnan di antes cu a keda atras den e area aki  y cu awor nos a haci completamente limpi pa despues pone e santo nobo. Mei mei di e matanan di druif e area ta mustra hopi mas bunita y por mira cu e parti aki y beach a uni na otro. Pues famianan tin mas opcion unda nan kier pasa dia y disfruta di nos playanan. 

Tambe lo coloca e barinan pa colecta desperdicio den forma separa. Aruba Tourism Authority lo introduci esakinan na nos playanan tambe. 

Por ultimo nos kier a avisa cu otro playnan tambe ta riba nos lista pa asina haya santo blanco.